Сэтинньи 25 күнэ киһи-аймах чулуу айымньытынан биллэриллибит Олоҥхо күнүнэн биллэр. Бу күн Саха Өрөспүүбүлүкэтигэр олоҥхоҕо аналлаах араас тэрээһин ыытыллар. Ол сиэринэн, биһиги оройуоммутугар оскуола оҕолоругар аналлаах тэрээһин үгэс быһыытынан, А.Г.Кудрин-Абаҕыыныскай аатынан оскуолатыгар буолан ааста. Бу үүнэр көлүөнэ ыччаты өбүгэ улуу айымньытыгар сыһыарар сыаллаах тэрээһиҥҥэ оройуон оскуолаларын оҕолоро быйыл бэһис төгүлүн муһуннулар. Түһүлгэҕэ мустубут дьону оскуола директора Евгений Владимирович Горохов эҕэрдэлииригэр оҕону иитиигэ олоҥхо сүдү суолтатын бэлиэтээн эттэ. Эҕэрдэни Бүтүн Россиятааҕы көрүү-куонкурус дипломана “Күнчээн” ансамбль (салайааччы СӨ үөрэҕириитин туйгуна У.Н.Лазарева) ырыата ситэрэн биэрдэ, кэрэ эйгэтигэр аан аста. Үгэс быһыытынан, оройуон оскуолалара сыл аайы олоҥхо туруоран, көрөөччү дьүүлүгэр таһаараллар. Быйылгы дьыл түмсүүтүн 1-Нөөрүктээйи оскуолатын үөрэнээччилэрэ “Дьурайаан Бэргэн” олоҥхону туруоран, көрөөччүлэр биһирэбиллэрин ыллылар.Бу олоҥхону ССРС культуратын туйгуна, сцена ветерана Х.В.Турантаева салайааччылаах оскуола учууталларын бөлөҕө туруорбут. Олоҥхону сэргээн көрөн баран, түмсүү кыттыылаахтара араас түһүлгэлэринэн тарҕастылар. “Ойуу-дьарҕаа оһуордаах саха талба таҥаһа түһүлгэҕэ” нэһилиэк уран тарбахтааҕа, ветеран-учуутал Николаева Ирина Романовна таҥас кырадаһыктарынан араас бэйэлээх кэрэ оҥоһуктары тигэн таһаарыахха сөбүн көрдөрдө, уус кистэлэҥнэрин кытта үллэһиннэ. Аттынааҕы кылааска кыл-сиэл оҥоһуктар быыстапкалара тардылынна, манна эбии үөрэхтээһин учуутала Мария Дмитриевна Захарова салалтатынан куруһуокка дьарыктанар оҕолор уонна уран тарбахтаах төрөппүт Лена Ивановна Сигаева оҥоһуктара дьон-сэргэ болҕомтотун тартылар. “Сахам далбар сандалыта” түһүлгэни быһа ааспыт киһи суох буолла быһыылаах. Ол курдук, бу түһүлгэҕэ төрөппүт Елизавета Николаевна Федорова алаадьы кутан, физика учуутала Саргылана Степановна Софронова, библиотекарь Людмила Владимировна Петрова, баһаатай Яна Юрьевна Осипова оҥорбут сахалыы баахылалара түһүлгэ ыалдьыттарын астыннарда, оҕолор бэйэлэрэ тутан-хабан алаадьы астаан көрдүлэр. Түһүлгэлэр үлэлиир кэмнэригэр “Олоҥхо уонна литература” диэн литература сылыгар аналлаах конференция ыытылынна. Конференцияҕа олоҥхо уонна литература тематыгар сахалыы тылынан дакылааттар ааҕылыннылар. 1-Нөөрүктээйи оскуолатын библиотекара, “Гражданскай килбиэн” бочуоттаах бэлиэ хаһаайката Феодосия Сергеевна Чемпосова салайааччылаах дьүүллүүр сүбэ быһаарыытынан , үһүс бочуоттаах миэстэҕэ Абаҕа орто оскуолатын 5 кылааһын үөрэнээччитэ Айсен Афанасьев, иккискэ - 1-Нөөрүктээйи оскуолатын үөрэнээччитэ Оля Селлябиева тигистилэр, кыайыылааҕынан Абаҕа орто оскуолатын 11 кылааһын үөрэнээччитэ Ира Максимова ааттанна. Олоҥхо күнүн түмүктээн, “Өбүгэлэр оонньууларыгар” “алаастан” “алааска” тиийэн, араас сорудаҕы улахан кылаас үөрэнээччилэрэ толордулар. Бу оонньууну физкультура учуутала Пелагея Ивановна Аржакова толкуйдаан, иилээн-саҕалаан ыытта. Наҕараадалары, махтал суруктары Өлүөхүмэ оройуонун үөрэҕин управлениетын аатыттан Марина Васильевна Соватина туттаран, тэрээһини түмүктээтэ.
Контакты
Наш адрес: 678100, РС (Я), Олекминский район,
г. Олекминск, ул. Молодежная, д. 10
Тел/факс: 8 (41138) 3-14-44
E-mail: mkuuoor@mail.ru
Анонсы