Оройуон оскуолаларыгар олунньу ыйга төрөөбүт тылга сыһыаннаах араас тэрээһиннэр ыытыллаллар, бу тэрээһиннэргэ оҕолор көхтөөхтүк кытталлар. Ый бүтүүтэ биир эмиэ үтүө үгэс буолбут түмсүү – Өлуөхүмэ оройуонун оскуолаларын үөрэнээччилэрин ортотугар саха тылын баһылааһыҥҥа туһуламмыт “Куолу- 2016” күөн күрэс ыытылынна. Олохтоммут бэрээдэк быһыытынан, бу түмсүү сыл аайы оскуолаттан оскуолаҕа көһө сылдьан тэриллэр. Быйылгы түмсүү кыттыылаахтарыгар ыалдьытымсах Кыыллаах орто оскуолата аанын тэлэйэн, сахалыы сиэринэн ыалдьыттары көрүстэ. Оҕолорго алгыс тылын саха тылын, литературатын учуутала А.С.Корнилова анаата, дьиэлээх хаһаайыттар ааттарыттан оскуола салайааччыта А.П.Макарова эҕэрдэлээтэ. Араас оскуолаттан мустубут саастыылаахтарын Кыыллаах оскуолатын үөрэнээччилэрэ сахалыы дорҕоон доҕуһуолунан, хомус дьүрүлгэнинэн, тэтимнээх үҥкүүнэн көрүстүлэр. Түмсүүнү үөрүүлээх быһыыга-майгыга аһан, кыттыылаахтар үс түһүмэхтээх күөн күрэскэ көрүстүлэр. Араас тиэмэлэргэ оҕолор бэйэлэрин санааларын төрөөбүт сахаларын тылынан сайа эттилэр, тылы билиигэ күрэхтэстилэр, тута хоһуйан этэргэ холоннулар. Оройуон сэттэ оскуолатыттан Токоттон, Уолбуттан, Киндигиртэн, Хороттон,1-Нөөрүктээйиттэн, Кыыллаахтан, Абаҕаттан 45 үөрэнээччи күөн көрүстэ. Кыттааччылар икки бөлөххө араҕыстылар. Дьүүллүүр сүбэ быһаарыытынан, орто сүһүөх кылаас үөрэнээччилэригэр 3 миэстэни Федосеев Дима (1-Нөөрүктээйи),2 миэстэни – Данилова Настя (Кыыллаах) ыллылар, кыайыылааҕынан – Лепчикова Софья (Хоро) ааттанна. Үрдүкү кылаас үөрэнээччилэригэр түмүк маннык буолла: 3 миэстэни Голомарева Валерия (Хоро), 2 миэстэни – Максимова Ира (Абаҕа) ыллылар, кыайыылааҕынан Томская Сардаана (Хоро) таҕыста. Алын кылаастарга курэх тумугэ:
I миэстэ – Кыыллаах орто оскуолата;
II миэстэ – 1 – Нөөрүктээйи орто оскуолата;
III миэстэ – Хоро орто оскуолата.
Мүнүүтэҕэ ааҕыыга:
1 кылаастарга – Торговкина Лиза (Кыыллаах);
2 кылаастарга – Максимова Ираида (Кыыллаах);
3 кылаастарга – Корнилова Софья (Кыыллаах);
4 кылаастарга – Кугасова Ася (Кыыллаах).
Аахпыттан кэпсээһиҥҥэ:
Ипатьев Олег – 4 кылаас (Хоро)
Өйтөн дорҕоонноохтук ааҕыы:
Чемпосова Василиса – 2 кылаас (1 - Нөөрүктээйи)
Тута хоһуйуу:
Кугасова Ася – 4 кылаас (Кыыллаах)
Түмсүүнү саха тылын, литературатын, культуратын учууталларын Өлүөхүмэ оройуонунааҕы методическай түмсүүтүн салайааччыта Р.И.Уйгурова иилээн-саҕалаан ыытта. Тэрээһин өрө көтөҕүллүүлээхтик ааста,хаартыскаҕа түһүүнэн түмүктэннэ. Ити гынан баран, тэрээһин түмүктэммитин да кэннэ, оскуолалар делегациялара бары тарҕаһыахтарыгар диэри ыалдьытымсах хаһаайыттар өбүгэлэр оонньууларын тэрийэн, оҕолору да, учууталлары да сэргэхситтилэр, саҥа санааны сахтылар. Мустубут дьон дьиҥ-чахчы сахалыы тыыннаах оскуолаҕа ыалдьыттаан, санааларын сайа этэн, сүргэлэрэ көтөҕүллэн тарҕаспыттарыгар оскуола салайааччыта А.П.Макарова, солбуйааччыта Р.Е.Лавернова, саха тылын учууталларын өҥөлөрө буолар.
Контакты
Наш адрес: 678100, РС (Я), Олекминский район,
г. Олекминск, ул. Молодежная, д. 10
Тел/факс: 8 (41138) 3-14-44
E-mail: mkuuoor@mail.ru
Анонсы